انتبه لزوجتك ليله الدخله

انتبه لزوجتك ليلة الدخله !



هـذا واحد تـوه معرس وخلصت الزفه والامور اللي باالقصر

اخونا في الله شغلل[ اخذ حرمته ] وركبوا السيارة ودعس للقصيم

يعني اهل العروسه في الرياض وهو ساكن في القصيم

والبنيه تستحي ومقرطه طوول الطريق

والرجال ماغير يسولف ويهذر والبنيه ساكته...ماحولك احد !

الرجال يأس من البنت انها تكلم وقال ياولد ماوراه هذره

اشغل المسجل وامسك الخط !

في الوقت نفسه البنت كانت حسرانه ومتوهقه انها بس تتكلم عشان

تقوله ابي الحمام الله يكرمكم !

عاد هي طمررت على المرتبه اللي ورا عشان تنسدح ويخف

عليه الوجع الين يوصلون لمحطه .. المهم الرجال ماوعى الا وهاذيك

محطه ويصفط عنده وينزل للبقاله ياخذ له كم كيس فصفص وكم علبة

بيبسي للطريق هو كان وده ياخذ له شريط يسليه بالطريق بس خبركم

مايصلح يشغل شريط والافضل يخليها سواليف !

البنت على نزلة زوجها الا وتقز هاذيك الحمامات حقات الحريم

اللي عند المسجد اللي جنب البقاله قالت لنفسها يابنت يمديني

اطمر واخلص وارجع قبل لا يرجع هو من البقاله !

المهم المسكينه راحت واخذت وقتها .. اخينا في هالوقت قد رجع

للسياره وعلى باله مرته في المرتبه اللي وراء وخبركم عبايه سودا

واخر الليل مانتبه انه مهيب فيه السياره وهو شغل ودعس !

البنيه المسكينه طلعت وهي مرتاحه وتناظر يابنت وين السياره ؟

وتتلفت ماتشوف غير الهنود حق المحطه وابو يمن حق البقاله !

عاد تخيلوا الصدمه يوم عررفت ان زوجها دق سلف ومشى جالسه

تتأمل المسكينه في نفسها يمكن راح منا ولامنا وبيرجع !

شوي ماوعت الا ذاك الجمس المقبل يوم وقفوا عند البقاله اللي جنبها !

وتقز الحريم اللي في الجمس قالت زين عائله وتروح وترمي نفسها

على الحرمه اللي قدام وهي ام العيله وتقولها خالتي انا داخله على الله

ثم عليك..وهذي قصتي !!!

والعجوز تمسك راسها وتقولها.. يابنيتي انتي تعرفين سيارة زوجك ؟؟

ما اطول عليكم عبوا بانزين ويدعسون وراااااه !

نعود الان لصاحب الفصفص

اخونا في الله مريح وماشي بعد مالقوه على بعد نص ساعه

عاد تخيل عزيزي القارئ انك على طريق القصيم وفجأة وراك

جمس يكبس بالنور بشكل مخيف يبيك توقف وش ردة فعلك ؟؟؟؟

اكييد الرجال دعس قال ذولا مهابيل بيضروني ومعي عروستي !

ويافشيله اذا انطقينا ههههههههه

والجمس وراه داعس يحاول انه يوقفه المهم الذهين اللي يسوق

الجمس عرف وش يسوي قام يولع نور الجمس اللي داخل عشان

يشوف انها عايله !!!

واخيرااااااا ..انتبه ووقف يبي يشوف وش عنده نزل معصب !!!

عاد من اللي متوهق في هاالموقف راعي الجمس يقول في نفسه

شلون اقوله ان مرته معنا ؟؟

يبي يجبها بااسلوب تدريجي عشان ماينصدم خبركم في مثل هالمواقف

شبيقولون اهل العروسة ؟؟ اخذت بنتنا وضيعتها ؟؟

والله ان تلزق فيك السالفه طول عمرك والعالم يتمشون

وماعندهم سالفه غيرك ... المهم راعي الجمس سلم وقال يااخوي

ماكأنك مضيع لك شي ؟؟؟؟؟؟؟

قاله المعرس لا والله ماضيعت شي !

قال متأكد ؟؟؟

قال المعرس : شلون ؟

قال راعي الجمس رح طل في سيارتك شف فيه شي ناقص لك !

العريس قام يوسوس المشكله مرته ماجت على باله !

المهم راح ودخل سيارته وقال يا مره فيه شي طاح منن وحنا

في المحطه ؟؟ طبعاً محد رد عليه !!

ويوم لون وجهه بدا يميل للكرت الاحمر وين راحت المره ؟؟؟

ورجع لراعي الجمس وقال هات السالفه ؟؟؟

قال ياولد مرتك لقيناها في المحطه انا واهلي وقالت لنا انها نزلت

للحمام وانت مشيت ولا دريت عنها !!!!

عاد العريس كل انواع النفضات نزلت عليه تلعثم ولاقدر يتكلم

المهم راعي الجمس راح وقال للعروسه يلا طسي عند زوجك

شوفيه متصومع عليك ههههههههه

المهم العروسه اركبت مع زوجها السياره وانطلق لسانها اللي كان

مربوط وقامت تتعذر له !

وتقول لاتزعل مني اناكنت مستحيه اقولك اني ابي الحمام وانت

مشاء الله عليك ركبت السياره وانطلقت هههههه

ياشين التميلح..توها تتميلح..عاد انقلب الوضع صار العريس

هو اللي مبرطم طول الطريق والعروسه هي اللي تبربر ههههههههه

مابقى الا تسوق عشان اخينا في الله يرتاح من اللي حصل !!!

============ وبس سلامتكم هههههههههههه

__________________

مشكور اخ عروبه على المرور الجميل
تحياتي لك